Get Adobe Flash player

ບົດ​ຄວາມ​ໃໝ່​ສຸດ

ບຸກຄົນອອນໄລນ໌

ເຮົາມີ 22 ບຸກຄົນທົ່ວໄປ ອອນໄລນ

ເຊື່ອມຕໍ່ພວກເຮົາທີ່:

ຈຳນວນຜູ້ເຂົ້າເບິ່ງເວັບ

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterມື້ນີ້914
mod_vvisit_counterມື້ວານ7245
mod_vvisit_counterອາທິດນີ້14448
mod_vvisit_counterອາທິດຜ່ານມາ8336
mod_vvisit_counterເດືອນນີ້35184
mod_vvisit_counterເດືອນຜ່ານມາ76174
mod_vvisit_counterທັງໝົດ732773

ເຮົາມີ: 9 ບຸກຄົນທົ່ວໄປ, 1 bots ອອນໄລນ
Your IP: 54.243.23.129
 , 
ມື້ນີ້: ວັນ​ທີ 20 ມ. ສ., 2014

ແຜນ​ທີ່​ຜູ່​ເຂົ້າ​ເບິ່ງ​ເວັບ

Locations of visitors to this page

 

ມີ​ວິ​ທີ​ທາງ​ລັດ​ແນວ​ໃດ ທີ່​ຈະ​ຊ່ວຍ​ໃຫ້​ຄົນ​ຫາຍ​ຄວາມ​ສົງ​ສັຍ​ໄດ້ ໃຫ້​ແຈ້ງ ​ໃຫ້​ສະ​ຫວ່າງ​ໃນພຣະ​ທັມໄດ້​ໄວ​ຂຶ້ນ​?

User Rating: / 3
ບໍ່ດີເລີຍດີທີສູດ 
Share
Font size:

ຄຳ​ຖາມ​:

ມີ​ວິ​ທີ​ທາງ​ລັດ​ແນວ​ໃດ ທີ່​ຈະ​ຊ່ວຍ​ໃຫ້​ຄົນ​ຫາຍ​ຄວາມ​ສົງ​ສັຍ​ໄດ້ ໃຫ້​ແຈ້ງ ​ໃຫ້​ສະ​ຫວ່າງ​ໃນພຣະ​ທັມໄດ້​ໄວ​ຂຶ້ນ​?

iconດາວ​ໂຫຼດ/Download

ຄຳ​ຕອບ 9 ຂໍ້​:

 

ຂໍ້​ທີ 1:

ຕ້ອງ​ເຂົ້າ​ໃຈ ຕ້ອງ​ໄດ້​ທຳ​ຄວາມ​ເຂົ້າ​ໃຈກ່ຽວ​ກັບ​ໃນ​ວິ​ຊາ​ທັມ​ມະ ຕ້ອງ​ຮູ້​ຈັກ​ວ່າ​ທັມ​ມະ​ຄື​ອັນ​ໃດ​ ຕ້ອງ​ຮູ້​ໃຫ້​ລະ​ອຽດ ຈິ່ງ​ຈະ​ຢ້ອນ​ລັດ​ຕັດ​ຕອນ​ໄດ້ ຈິ່ງ​ຈະ​ສາ​ມາດ​ຜ່ານ​ຜ່າ​ໄປ​ໄດ້

ຂໍ້​ທີ 2:

ຕ້ອງ​ເຫັນ​ເຫດຕ້ອງ​ເຫັນ​ຜົນ ຕ້ອງ​ຮູ້​ວ່າ​ເຫດ​ມາ​ແຕ່​ໃສ​? ຕ້ອງ​ຮູ້​ຈັກ​ວ່າ ໃນ​ເມື່ອ​ມີ​ເຫດ​ແບບ​ນີ້​ແລ້ວ ຜົນເປັນ​ແນວ​ໃດ​? ຕ້ອງ​ຮູ້​ຈັກ​ທັງ​ເຫດ ແລະ​ຜົນ

ຂໍ້​ທີ 3:

ຕ້ອງ​ຟັງ​ຄຳ​ສອນ ແລະ​ເອົາ​ໃຈ​ໃສ່​ຢ່າງ​ເອົາ​ຈິງ​ເອົາ​ຈັງ ໃນ​ເມື່ອ​ເອົາ​ໃຈ​ໃສ່​ແລ້ວ ກໍ​ຕ້ອງ​ໄດ້​ພິ​ນິດ​ພິ​ຈາລະ​ນາ ພິ​ຈາ​ລະ​ນາ​ລົງ​ໄປ​ຢ່າງ​ເລິກໆ ເພື່ອ​ຈະ​ເຂົ້າ​ໃຈ​ໄດ້ ເພື່ອ​ຈະ​ເຫັນ​ດ້ວຍ​ປັນ​ຍາ​ຂອງ​ເຈົ້າ​ຂອງ​ເອງ ແລະເພື່ອ​ຈະ​ແຈ້ງ​ດ້ວຍ​ປັນ​ຍາ​, ທັມ​ມະ​ກໍ​ຄື​ທຸກ​ສິ່ງ​ທຸກ​ຢ່າງ ທຸກ​ສິ່ງ​ທຸກ​ຢ່າງ​ເອີ້ນ​ວ່າ​: “ທັມ​ມະ​” ເອີ້ນ​ວ່າ “ພາ​ວະອັນ​ທີ່​ລະ​ອຽດ​ອ່ອນຊ້ອນ​ຢູ່​ໃນ​” ມີ​ຫຼາຍ​ຊັ້ນ​ມີ​ຫຼາຍ​ຫຼືບ ແລະ​ມີ​ສະ​ພາ​ວະ​ອັນ​ທີ່​ລະ​ອຽດ ຈົນ​ເອີ້ນ​ໄດ້​ວ່າລະອຽດ ແລະ​ລະ​ອຽດ​ເຖິງ​ທີ່​ສຸດ ລະ​ອຽດ ແລະລະ​ອຽດ​, ເອີ້ນ​ຍາກ ເວົ້າ​ຍາກ ເພາະ​ວ່າ​ສິ່ງ​ທີ່​ຕາ​ແນມ​ບໍ່​ເຫັນ ສິ່ງທີ່​ວິ​ເຄາະ​ວິ​ຈັຍ​ບໍ່​ໄດ້ ແລະ​ບໍ່​ສາ​ມາດ​ໃຊ້​ເຄື່ອງ​ວິ​ເຄາະ​ວິ​ຈັຍ​ອອກ​ມາ​ໄດ້ ເລື້ອງ​ນີ້​ເປັນ​ເລື້ອງ​ທີ່​ເຊື່ອ​ຍາກ ທັງເຊື່ອ​ຍາກ ແລະ​ບໍ່​ຢາກ​ເຊື່ອ​ອີກ ເພາະ​ວ່າ​ເປັນ​ເລື້ອງ​ທີ່​ບໍ່​ມີ​ຕົວ​ຕົນ

ຂໍ້​ທີ 4:

ສະ​ພາ​ວະ​ເປັນ​ຂອງ​ທີ່​ເອົາ​ມາ​ຢືນ​ຢັນ​ຕໍ່​ກັນ​ບໍ່​ໄດ້ ເພາະ​ວ່າ​ເປັນ​ສິ່ງ​ທີ່​ເໜືອ​ຄວາມ​ສາ​ມາດ ເໜືອການ​ວິ​ເຄາະວິ​ຈັຍ ແລະ​ເປັນ​ສິ່ງ​ທີ່​ບອກ​ວ່າ “ຮູ້​ໄດ້​ສະ​ເພາະ​ຕົນ​”

ຂໍ້​ທີ 5:

ເລື້ອງ​ນີ້​ບໍ່​ແມ່ນ​ເລື້ອງ​ທຳ​ມະ​ດາ ແລະ​ບໍ່​ແມ່ນ​ເຮັດ​ໄດ້​ງ່າຍໆ ເປັນ​ເລື້ອງ​ຍາກ ເປັນ​ເລື້ອງ​ທີ່​ມີ​ຄວາມ​ຮັບຜິດ​ຊອບ​ສູງ ແລະ​ໃຊ້​ປັນ​ຍາ​ອັນ​ແຫຼມ​ຄົມທີ່​ສຸດ ຈິ່ງ​ຈະ​ສາ​ມາດ​ຜ່ານ​ຜ່າ​ໄດ້ ຈິ່ງ​ຈະ​ສາ​ມາດ​ຮູ້ ແລະ​ເຂົ້າ​ໃຈ​ໄດ້ ເລື້ອງ​ນີ້​ບໍ່​ແມ່ນ​ເລື້ອງ​ຕາມ​ເປັນ​ຕາມ​ເກີດ ເລື້ອງ​ນີ້​ເປັນ​ເລື້ອງ​ທີ່​ເໜືອ​ຄວາມ​ສາ​ມາດ​ຂອງ​ບຸກ​ຄົນ​ທຳ​ມະ​ດາ ເອີ້ນ​ວ່າ​ເປັນ​ເລື້ອງ​ທີ່​ຕ້ອງ​ໄດ້​ເຈາະ​ຈີ້ມ ເຈາະ​ຈີ້ມ​ແບບ​ຈົດ​ຈໍ່ ຈົນ​ໃຫ້​ເຫັນ​ຄວາມ​ລະ​ອຽດ ແຕ່​ຕ້ອງ​ໃຊ້​ປັນ​ຍາ ໃຊ້ປັນ​ຍາ​ຢ່າງ​ດຽວ ໃຊ້​ປັນ​ຍາ​ເບິ່ງໃຊ້​ປັນ​ຍາ​ຕັດ​ສິນ ໃຊ້​ປັນ​ຍາ​ພິ​ນິດ​ພິ​ຈາ​ລະ​ນາ ໃຊ້​ປັນ​ຍາ​ຕິດ​ຊັ່ງ​ເບິ່ງ ໃຊ້ປັນ​ຍາ​ແຍກ​ອອກແຍກ​ອອກ ແຍກ​ອອກ​ແລ້ວຕ້ອງ​ເບິ່ງ​ດ້ວຍ​ປັນ​ຍາ​ອີກ ເບິ່ງ​ຈົນ​ໃຫ້​ເຫັນ​ວ່າ​ອັນ​ໃດເປັນອັນ​ໃດ​? ຄຳ​ວ່າ“ອັນ​ໃດ​ເປັນ​ອັນ​ໃດ​?” ບໍ່​ແມ່ນ​ທຳ​ມະ​ດາ! ຕ້ອງ​ຮູ້​ເຫດ​ຕ້ອງ​ຮູ້​ຜົນ ຕ້ອງ​ຮູ້​ຕົ້ນ​ປາຍສາຍ​ເຫດ ຕ້ອງ​ຮູ້​ຕ້ອງ​ເຂົ້າ​ໃຈວ່​າ​ສິ່ງ​ເຫຼົ່າ​ນີ້​ມາ​ຈາກ​ໃສ​? ອັນ​ໃດ​ເປັນ​ອັນ​ໃດ​? ອັນ​ໃດ​ຂອງ​ຈິງ​? ອັນ​ໃດຂອງ​ບໍ່​ຈິງ​? ອັນ​ໃດ​ຂອງ​ແທ້​? ອັນ​ໃດ​ຂອງ​ບໍ່​ແທ້​?

ຂໍ້​ທີ 6:

ຕ້ອງ​ສັງ​ລວມ​ເບິ່ງ ເບິ່ງ​ແບບ​ລວມໆ ແລະ​ເບິ່ງ​ແບບ​ຕ້ອມ​ເຂົ້າ​ແລ້ວ ພ້ອມ​ທັງ​ສະ​ຫຼຸບ​ເບິ່ງ ອັນ​ໃດພາ​ໃຫ້​ທຸກ​ຂ໌? ສະ​ຫຼຸບ​ເບິ່ງ​ບ່ອນ​ນີ້​! ອັນ​ໃດ​ພາ​ໃຫ້​ຍາກ​ໃຫ້​ລຳ​ບາກ​? ສະ​ຫຼຸບ​ເບິ່ງ​ບ່ອນ​ນີ້​! ອັນ​ໃດ​ພາ​ໃຫ້​ຂ້ອງໃຫ້ຄາ​? ສະ​ຫຼຸບ​ເບິ່ງ​ບ່ອນ​ນີ້​! ອັນ​ໃດ​ພາ​ໃຫ້​ຄິດ​ຫຼາຍ​? ສະ​ຫຼຸບ​ເບິ່ງ​ບ່ອນ​ນີ້​!  ອັນ​ໃດ​ພາ​ໃຫ້​ວຸ້ນ​ວາຍ​ສັບ​ສົນ​? ສະ​ຫຼຸບ​ເບິ່ງ​ບ່ອນ​ນີ້​! ບ່ອນ​ນີ້​ມັນ​ມີ​ອັນ​ໃດ​? ມັນ​ມີ​ອັນ​ໃດ​ແນ່​? ມັນ​ມີ​ດີ ຫຼື​ມັນ​ມີ​ບໍ່​ດີ​? ມັນ​ໄດ້​ປະ​ໂຫຍດ ຫຼືມັນເສັຍ​ປະ​ໂຫຍດ​? ມັນ​ພາ​ໃຫ້​ທຸກ​ຂ໌ ຫຼື​ມັນ​ພາ​ໃຫ້​ສຸ​ຂ? ຕ້ອງ​ຮູ້​ຕ້ອງ​ເຫັນ ຕ້ອງ​ເຂົ້າ​ໃຈ ຕ້ອງ​ເຂົ້າ​ໃຈ​ໃຫ້ໄດ້ຢ່າງ​ລະ​ອຽດ

ຂໍ້​ທີ 7:

ຕ້ອງ​ໄດ້​ຝຶກຕ້ອງ​ໄດ້​ປະ​ຕິ​ບັດ ຕ້ອງ​ໄດ້​ອົບ​ຮົມ​ບົ່ມ​ເພາະ ແລະ ​ຕ້ອງ​ໄດ້​ເອົາ​ການ​ພິ​ນິດ​ພິ​ຈາ​ລະ​ນາມາ​ໃຊ້​ອີກ ເພາະ​ວ່າ​ເຮັດ​ອັນ​ໃດຕ້ອງ​ໄດ້​ເອົາ​ໃຈ​ໃສ່​, ໃນ​ເມື່ອ​ເອົາ​ໃຈ​ໃສ່ກໍ​ຕ້ອງ​ໄດ້​ພິ​ນິດ​ພິ​ຈາ​ລະ​ນາ ຖ້າ​ບໍ່ພິ​ຈາ​ລະ​ນາຕ້ອງ​ໄດ້​ຍາກ ໄດ້​ຍາກ​ທີ່​ສຸດ ອາດ​ຈະ​ບໍ່​ໄດ້​ກໍ​ໄດ້ ອາດ​ຈະ​ບໍ່​ໄດ້​ເລີຍ​ກໍ​ໄດ້ ເພາະ​ວ່າ​ຄວາມ​ຜິດພາດຢູ່​ໃນ​ສ້ຽວ​ວິ​ນາ​ທີ ຖ້າ​ບໍ່​ເຂົ້າ​ໃຈ​ຈະ​ຖືກ​ມານ​ລາກ​ໄປ ຈະ​ຖືກ​ມານ​ງັບ​ເອົາ ງັບ​ເອົາ​ແລ້ວ​ກໍ​ວ່າ​ໂຕ​ໄດ້​ນັ້ນໄດ້​ນີ້ ກໍ​ວ່າ​ໂຕ​ເປັນ​ຜູ່​ນັ້ນ​ຜູ່​ນີ້ ກໍ​ບອກ​ຜູ່​ນັ້ນ​ຜູ່​ນີ້​ຕໍ່​ອອກ​ໄປ ປະ​ກາດ​ຕົນ​ເອງ​ແບບ​ນັ້ນ ປະ​ກາດ​ຕົນ​ເອງ​ແບບ​ນີ້ ແບບ​ເອົາ​ຕາມ​ຂອງ​ຫຼອກ ວ່າ​ໂຕ​ໄດ້​ນັ້ນ​ວ່າ​ໂຕ​ໄດ້​ນີ້ ວ່າ​ມີ​ອັນ​ນັ້ນ​ວ່າ​ມີ​ອັນ​ນີ້ ກາຍ​ເປັນ​ເຂົ້າ​ລ້າງ​ທຽມ​ຊົງ​ໄປເໝິດ ກາຍ​ເປັນ​ໂງ່​ເຂົາ​ເບົາ​ປັນ​ຍາ ກາຍ​ເປັນ​ງົມ​ງວາຍ​ງົມ​ງາຍ ກາຍ​ເປັນ​ຄົນ​ຫຼົງ​ທາງ​ໂດຍ​ບໍ່​ຮູ້​ສຶກ​ຕົວ​.  ການຝຶກ​ການ​ປະ​ຕິ​ບັດ​ນີ້​ເປັນ​ເລື້ອງ​ສຳ​ຄັນ ຖ້າ​ເຮັດ​ບໍ່​ເຂົ້າ​ໃຈຈະ​ເກີດ​ບັນ​ຫາ ຈະ​ໄດ້​ແບກ​ບັນ​ຫາ ແບກ​ບັນ​ຫາ​ຕະຫຼອດ​ຊາດ ເພາະ​ວ່າ​ໂຕ​ເອງ​ບໍ່​ຮູ້​ບໍ່​ແຈ້ງ ກໍ​ຕ້ອງ​ເອົາ​ຄວາມ​ບໍ່​ຮູ້​ບໍ່​ແຈ້ງ ໄປ​ບອກ​ໄປ​ສອນ​ຜູ່​ອື່ນ ໄປ​ແຜ່​ອອກ ໃນເມື່ອ​ແຜ່​ອອກ​ແລ້ວ ລູກ​ມັນ​ກໍ​ຕ້ອງ​ເກີດ ລູກ​ມັນ​ກໍ​ຄື​ລູກ​ມານ​ນັ້ນ​ແລ້ວ ລູກ​ມານ​ເກີດ​ຢູ່​ໃນ​ໂຕ​ຄົນ ຄົນ​ກໍ​ບໍ່​ຈັກ​, ໃນ​ເມື່ອ​ຄົນ​ບໍ່​ຈັກ ລູກ​ມານ​ກໍ​ມີ​ສິດ​ຄອບ​ງຳ​ເອົາ ຄອບ​ງຳ​ເອົາ​ແບບ​ເຈົ້າ​ຂອງ​ບໍ່​ຮູ້​ສຶກ​ຕົວ ໃນ​ເມື່ອ​ບໍ່​ຮູ້​ສຶກ​ຕົວກໍຕ້ອງ​ຖິ້ມ ​ພຣະ​ພຸ​ທ ພຣະ​ທັມ ພຣະ​ສົງ​ຄ໌ ຖິ້ມ​ພຣະ​ຣັຕ​ຕະ​ນະ​ຕຣັຍ​ ເວົ້າ​ຊື່ໆ ແຕ່ໃນ​ຫົວ​ໃຈ​ບໍ່​ມີ​! ເວົ້າ​ຊື່ໆ ໃນ​ຫົວ​ໃຈ​ເຈົ້າ​ຂອງ​ບໍ່​ເກີດ​! ເວົ້າ​ຊື່ໆ ພື້ນ​ທີ່​ເຈົ້າ​ຂອງ​ບໍ່​ມີ​ຮອງ​ຮັບ​! ເວົ້າ​ຊື່ໆວ່າ​ “ພຸ​ທ​ທັງ ສະ​ຣະ​ນັງ ຄັຊ​ຊາ​ມິ ທັມ​ມັງ ສະ​ຣະ​ນັງ ຄັຊ​ຊາ​ມິ ສັງ​ຄັງ ສະ​ຣະ​ນັງ ຄັຊ​ຊາ​ມິ​!” ແຕ່​ວ່າ​ເອົາ “​ເຈົ້າ​ພູມ​ສະ​ຣະ​ນັງ ຄັຊ​ຊາ​ມິ​! ເອົາ​ເຈົ້າ​ທີ່​ສະ​ຣະ​ນັງ ຄັຊ​ຊາ​ມິ ມາ​ເປັນ​ທີ່​ເພິ່ງ​!” ເອົາ​ເຈົ້າ​ນັ້ນ​ເຈົ້າ​ນີ້​ຂົນ​ເຂົ້າ​ມາ ເອີ້ນ​ຫາ ກາບ​ໄຫວ້​ຫາ ບວງ​ສວງ​ຫາ ບວງ​ສວງ​ແລ້ວກໍ​ບູ​ຊາ​ກາບ​ໄຫວ້ ກາບ​ໄຫວ້​ແລ້ວ​ກໍ​ລະ​ນຶກ​ຫາ ລະ​ນຶກ​ຫາ​ພວກ​ບໍ່​ຫຼຸດ​ພວກ​ບໍ່​ພົ້ນ ກວາດ​ມາເໝິດ​ທຸກໆ​ເຈົ້າ ຈັກ​ຄຸດຈັກ​ນາກ ຈັກ​ເທ​ພ​ເທວະ​ດາ ພຣົມ​ມານຢູ່​ຫົນ​ແຫ່ງ​ໃດກໍ​ເອີ້ນ​ມາ​ເໝິດ ແບບ​ນີ້​ຄືຄວາມ​ບໍ່​ເຂົ້າ​ໃຈ​! ຜູ່​ບໍ່​ເຂົ້າ​ໃຈ ຜູ່​ຍັງ​ບໍ່​ທັນ​ເຂົ້າ​ໃຈ ຜູ່​ຍັງ​ຫຼົງ​ທາງ ຜູ່​ຍັງ​ຫຼົງ​ພຣະ​ພຸ​ທ ຜູ່​ຍັງ​ຫຼົງ​ພຣະ​ທັມ ຜູ່​ຍັງ​ຫຼົງພຣະ​ສົງ​ຄ໌ ຜູ່​ຍັງ​ຫຼົງ​ພຣະ​ຣັຕ​ຕະ​ນະ​ຕຣັຍ​!

ຂໍ້​ທີ 8:

ຕ້ອງ​ຮູ້​ຕ້ອງ​ເຂົ້າ​ໃຈຢ່າງ​ຖືກ​ຕ້ອງ​ທີ່​ສຸດ ທັງ​ການ​ຝຶກທັງ​ການ​ປະ​ຕິ​ບັດ ຕ້ອງ​ຮູ້​ຈັກຕ້ອງ​ແຍກ​ແຍະ ອອກ​ໄດ້ຕ້ອງ​ແຍກ​ແຍະ​ເປັນ ຕ້ອງ​ເຊື່ອ​ໝັ້ນ​ໃນ​ການ​ທຳ​ດີ​ຂອງ​ເຈົ້າ​ຂອງ ແລະ​ຕ້ອງ​ເຊື່ອ​ຢູ່​ໃນ 8 ຂໍ້​ນີ້​:

 

1).

ເຊື່ອ​ຜົນ​ການ​ກະ​ທຳ​ເຈົ້າ​ຂອງ ເຊື່ອ​ແບບ​ວ່າ​ທຳ​ດີ​ພຽງ​ພໍຫຼື​ຍັງ​? ທຳ​ຖືກ​ທັງ​ເໝິດຫຼື​ຍັງ​? ທຳ​ດີ​ຊອບ​ທັງເໝິດ​ແລ້ວຫຼື​ຍັງ​? ຖ້າ​ຍັງ ຕ້ອງ​ທຳ​! ທຳ​ໃຫ້​ໄດ້​! ຖ້າ​ທຳ​ໄດ້​ແລ້ວ ດ້ວຍ​ຕີ​ລາ​ຄາ​ຊັ່ງ​ຊາ​ເບິ່ງ​ແລ້ວ ວ່າ​ຖືກຕ້ອງ​ທັງ​ເໝິດຈິ່ງ​ຄ່ອຍ​ເຊື່ອ ເຊື່ອ​ໃນ​ແຕ່​ລະ​ດ້ານ​ລະ​ດ້ານ

 

2.)

ຕ້ອງ​ເຫັນ​ອີກ​ວ່າ ເຈົ້າ​ຂອງ​ເປັນ​ຄົນ​ຕົງ​ໄປ​ຕົງ​ມາ ຫຼື​ຍັງ​? ຫຼື​ຍັງ​ບໍ່​ທັນ​ຕົງ​? ຖ້າ​ຍັງ​ບໍ່​ທັນ​ຕົງ ຕ້ອງ​ພະ​ຍາຍາມ​ເບັດ​ເຈົ້າ​ຂອງ ເບັດ​ຈົນ​ໃຫ້​ໄດ້ ເບັດ​ຈົນ​ໃຫ້​ເຂົ້າ​ໃນ​ຮ່ອງ​ຮອຍ ຂອງ​ອົງ​ຄ໌​ສົມ​ເດັດ​ພຣະ​ສັມ​ມາ​ສັມ​ພຸ​ທທະ​ເຈົ້າ

 

3.)

ຕ້ອງ​ເຫັນ​ວ່າ​ເຈົ້າ​ຂອງ​ມີ​ປັນ​ຍາຫຼື​ຍັງ​? ມີ​ປັນ​ຍາ​ພໍຕໍ່​ການ​ແກ້​ບັນ​ຫາຫຼື​ຍັງ​? ຖ້າ​ຍັງ ຕ້ອງ​ສ້າງ​ປັນ​ຍາຫຼາຍໆ​, ການ​ສ້າງ​ປັນ​ຍາ​ຕ້ອງ​ປ່ອຍ​ວາງ ຕ້ອງ​ຮູ້​ຈັກ​ປ່ອຍ​ວາງ ປ່ອຍ​ວາງ​ສິ່ງ​ທີ່​ເຂົ້າ​ມາ ແຕ່​ລະ​ສິ່ງແຕ່​ລະຢ່າງ ໃນ​ແຕ່​ລະ​ເລື້ອງ​ລະ​ເລື້ອງ ບໍ່​ໃຫ້​ມີ​ບັນ​ຫາ​ຂ້ອງ​ຄາ​ໃຈ ປ່ອຍ​ວາງ​ອອກ​ຈາກ​ຫົວ​ໃຈ ເອົາ​ບັນ​ຫາ​ໄວ້ຂ້າງ​ນອກ​ກ່ອນ ເອົາ​ບັນ​ຫາ​ໄວ້​ນອກ​ຫົວ​ໃຈ​ເຈົ້າ​ຂອງ ປັນ​ຍາ​ເຈົ້າ​ຂອງ​ຈິ່ງ​ຊິ​ຂຶ້ນ​ມາ ປັນ​ຍາ​ເຈົ້າ​ຂອງຈິ່ງ​ຈະແຫຼມ​ຄົມ ປັນ​ຍາ​ເຈົ້າ​ຂອງ​ຈິ່ງ​ຈະ​ຕັດ​ສິນ​ບັນ​ຫາ​ໄດ້ ຈິ່ງ​ຈະ​ແກ້​ໄຂ​ບັນ​ຫາ​ໄດ້ ຖ້າ​ຫາກ​ວ່າ​ເປັນ​ເລື້ອງ​ແກ້ຍາກກໍ​ຕ້ອງ​ໄດ້​ໃຊ້​ເວລາ​, ການ​ໃຊ້​ເວລາ​ກໍ​ຕ້ອງ​ໄດ້​ເອົາ​ໃຈ​ໃສ່​ທົບ​ທວນ ດ້ວຍ​ການ​ພິ​ນິດ​ພິ​ຈາ​ລະ​ນາ ການພິ​ນິດ​ພິ​ຈາ​ລະ​ນາ ​ຕ້ອງ​ມີ​ວິ​ທີ ດື່ມ​ນ້ຳ​ລົງ​ບໍ​? ກິນ​ອາ​ຫານ​ດີໆ​ບໍ​? ໝາຍ​ເຖິງ​ປອດ​ສານ​ພິດ ແລະ​ຢູ່​ບ່ອນ​ງຽບໆບໍ​? ຫຼື​ຫາ​ທັມ​ມະ​ຊາດ​ແຫ່ງ​ໃດ​ແຫ່ງ​ນຶ່ງ ທີ່​ໃດ​ທີ່​ນຶ່ງ ເພື່ອ​ໃຫ້​ທາດ 4 ທາງນອກ​ເຂົ້າ​ມາ​ເຊື່ອມ​ຕໍ່ພໍ​ໃຫ້​ໄດ້ທາງ​ອອກ ແລ້ວ​ກໍ​ລະ​ນຶກ​ເຖິງ​ຄຸນ​ພຣະ​ພຸ​ທ ຄຸນ​ພຣະ​ທັມ ຄຸນ​ພຣະ​ສົງ​ຄ໌ ຄຸນ​ພຣະ​ຣັຕ​ຕະ​ນະ​ຕຣັຍ​ທັງ​ຫຼາຍທັງ​ປວງ ທັງ​ຢູ່​ໃນ​ໂຕ​ເຈົ້າ​ຂອງ ແລະ​ຢູ່​ນອກ​ໂຕ​ເຈົ້າ​ຂອງ ແລະ​ຂໍ​ມອບ​ກາຍ​ຖວາຍ​ຊີ​ວິດ​ໃຫ້ໃຫ້​ພຣະ​ຜູ່​ສູງສຸດ ໃຫ້​ພຣະ​ທັມ​ມະ​ຊາດ​ເບື້ອງ​ສູງ​ສຸດ​!

 

4.)

ຕ້ອງ​ຮູ້​ຈັກ​ສົນ​ທະ​ນາ​ກັບ​ຜູ່​ທີ່​ມີ​ປັນ​ຍາສ່ຳ​ພໍ​ຮັບ​ກັນ​ໄດ້ ແລະ​ຕ້ອງ​ເບິ່ງ​ເຈົ້າ​ຂອງ ຕ້ອງ​ຟັງ​ເຈົ້າ​ຂອງ​ໄປພ້ອມ ຕ້ອງ​ເບິ່ງ​ຜູ່​ອື່ນ ຕ້ອງ​ຟັງ​ຜູ່​ອື່ນ​ໄປ​ພ້ອມ​ຄື​ກັນ ເບິ່ງ​ແລ້ວ​ຕ້ອງ​ຮູ້​ຈັກ​ສະ​ຫຼຸບ ສະ​ຫຼຸບ​ເອົາ​ບົດ​ຮຽນ ສະຫຼຸບ​ເອົາ​ປະ​ສົບ​ການ ສະ​ຫຼຸບ​ເອົາ​ສ່ວນ​ຜົນ​ດີ ສະ​ຫຼຸບ​ເອົາ​ບົດສອນ​ຊີ​ວິດ ສະ​ຫຼຸບ​ເອົາ​ບົດ​ຮຽນ​ອັນ​ລ້ຳ​ຄ່າ ຕ້ອງຖື​ວ່າ​ໄດ້​ພົບ​ຄູ​ໄດ້​ພົບ​ອາ​ຈານ ຖ້າ​ມີ​ຜູ່​ເສັຍ​ສະ​ຫຼະ​ສົນ​ທະ​ນາ​ນຳ ແຕ່​ຕ້ອງ​ເຂົ້າ​ໃຈວ່​າ​ ເຈົ້າ​ຂອງໄປ​ຂໍ​ເພິ່ງ​ຄົນອື່ນ ຢ່າ​ຄິດ​ວ່າ​ເຈົ້າ​ຂອງ​ຈະ​ສອນ​ຄົນ​ອື່ນ ຕ້ອງ​ຄິດ​ວ່າ​ຫາ​ປະ​ສົບ​ການ​ກ່ອນ ຫາ​ວິ​ທີ​ແນວ​ທາງ​ກ່ອນຫາຄວາມ​ຮູ້​ກ່ອນ ໄດ້​ຫຼື​ເສັຍ​ບໍ່​ທັນ​ວ່າ ຕ້ອງ​ຄິດ​ວ່າ​ມີ​ບົດ​ຮຽນ​ເພີ້ມ​ກ່ອນ ຕ້ອງ​ຄິດ​ວ່າ​ຫາ​ຜູ່​ຊ່ວຍ​ພິ​ເສດ​ກ່ອນ ຄິດ​ແບບ​ນີ້​ຈິ່ງ​ແມ່ນ​ພຣະ​ສາ​ວົກ​ຂອງ​ພຣະ​ອົງ​ຄ໌ ຈິ່ງ​ແມ່ນ​ພຣະ​ສາ​ວົກ​ແທ້ ພຣະ​ສາ​ວົກ​ຜູ່​ເປັນ​ຈິດ​ພຸ​ທ​ທະ ພຣະ​ສາ​ວົກ​ຂອງ​ຜູ່​ຮູ້​ຜູ່​ຕື່ນ​ຜູ່​ເບີກ​ບານ

 

5.)

ຕ້ອງ​ເຫັນ​ເຈົ້າ​ຂອງ ຕ້ອງ​ເຫັນ​ແຕ່​ລະ​ຢ່າງ​ແຕ່​ລະ​ຢ່າງ ຕ້ອງ​ແຍກ​ແຍະ​ເຈົ້າ​ຂອງ​ອອກ​ໃຫ້​ເປັນ ໃນ​ດ້ານ​ໃດກໍ​ຕາມຕ້ອງ​ຮູ້​ຈັກຕ້ອງ​ເຂົ້າ​ໃຈ ຕ້ອງ​ເຂົ້າ​ໃຈວ່​າ​ເໝິດ​ໂຕ​ເຈົ້າ​ຂອງ​ນີ້ເປັນ​ກ້ອນ​ທຸກ​ຂ໌ ກ້ອນ​ທຸກ​ຂ໌​ແທ້ໆ ກ້ອນ​ທຸກ​ຂ໌​ຈິງໆ​! ຖ້າ​ຫາກ​ວ່າ​ເຈົ້າ​ຂອງ​ເຫັນ​ແບບ​ນີ້ ກໍ​ຖື​ວ່າ​ເຈົ້າ​ຂອງ​ມາ​ຂ້າງ​ພຣະ​ພຸ​ທ​ທະ​ເຈົ້າ ມາ​ທາງ​ດີມາ​ທາງ​ຖືກມາ​ທາງ​ຊອບ ແລະ​ຕ້ອງ​ເຫັນ​ວ່າ​ເໝິດ​ໂຕ​ເຈົ້າ​ຂອງ​ນີ້​ບໍ່​ທ່ຽງ ບໍ່​ທ່ຽງ​ ມີ​ຄວາມ​ປ່ຽນ​ແປງຢູ່​ທຸກໆສ້ຽວ​ວິ​ນາ​ທີ ມີ​ຄວາມ​ປ່ຽນ​ແປງ​ຕະ​ຫຼອດ ແລ້ວ​ໃຫ້​ເຫັນ​ອີກ​ວ່າ ເໝິດ​ໂຕ​ເຈົ້າ​ຂອງ​ນີ້​ບໍ່​ແມ່ນ​ຕົວ​ຕົນ​ເຈົ້າ​ຂອງ ບໍ່​ແມ່ນ​ຈິງໆບໍ່​ແມ່ນ​ແທ້ໆ ເປັນ​ພຽງ​ແຕ່​ຫຸ່ນ​ປັ້ນ​ຂຶ້ນ​ມາ​ເທົ່າ​ນັ້ນ​ເອງ ເປັນ​ພຽງ​ແຕ່​ທາດ​ປະ​ກອບ​ກັນ​ເຂົ້າເທົ່າ​ນັ້ນ ເປັນ​ພຽງ​ແຕ່​ທາດ​ລວມ​ກັນ​ເຂົ້າ​ເທົ່າ​ນັ້ນ ເປັນ​ພຽງ​ແຕ່​ຫຼາຍສິ່ງ​ຫຼາຍ​ຢ່າງ ມາ​ປະ​ກອບ​ກັນ​ເຂົ້າ ແລ້ວ​ກໍ​ມີ​ການ​ປຸງ​ແຕ່ງ​, ໃນ​ເມື່ອ​ປຸງ​ແຕ່ງ​ແລ້ວກໍ​ຈິ່ງ​ເປັນ​ຕົວ​ຕົນ ເປັນ​ຕົວ​ຕົນ​ຂຶ້ນ​ມາ​ໄດ້ ຍ້ອນ​ວ່າ​ເຫດ​ທັງຫຼາຍ​ສົ່ງ​ຜົນ ຍ້ອນ​ວ່າ​ຜົນ​ເກີດ​ມາ​ຈາກ​ເຫດ ຕ້ອງ​ຮູ້​ຈັກ​ສະ​ຫຼຸບ​ລົງ ຕ້ອງ​ຮູ້​ຈັກ​ວ່າ​ຊີ​ວິດ​ຂອງ​ເຈົ້າ​ຂອງເປັນຊີ​ວິດ​ທີ່​ຢືມ​ມາ ຢືມ​ມາ​ຈາກ​ທາດ​ຜູ້​ເປັນ​ພໍ່ທາດ​ຜູ່​ເປັນ​ແມ່ ແລະ​ທາດ​ນັ້ນໆ ແລະ​ທາດ​ນີ້ໆ​ອີກ ຄວາມ​ຈິງເປັນ​ຄື​ແນວ​ນີ້ ຕ້ອງ​ຮູ້​ເຖິງ​ຄວາມ​ຈິງ ຕ້ອງ​ເຂົ້າ​ໃຈ​ເຖິງ​ຄວາມ​ຈິງ ຕ້ອງ​ຮູ້​ວ່າ​ຊີ​ວິດ​ເຈົ້າ​ຂອງ ຮ່າງ​ກາຍ​ເຈົ້າຂອງ​ເປັນ​ຂອງ​ຢືມ 100% ເປັນ​ຂອງ​ຢືມ​ມາ ເປັນ​ຂອງ​ຢືມ​ຈາກ​ເຈົ້າ​ໂລກ​ໜ່ວຍ​ນີ້ ແລະ​ມີ​ດອກ​ເບັ້ຍ ດອກເບັ້ຍ​ຊີ​ວິດ ດອກ​ເບັ້ຍ​ເກີດ​ຢູ່​ໃນ​ໂຕ​ເຈົ້າ​ຂອງ

 

6.)

ຕ້ອງ​ຝຶກ​ເຈົ້າ​ຂອງ​ໃຫ້​ໄດ້ ຕ້ອງ​ຝຶກ​ແບບ​ຖືກ​ຕ້ອງ​ທີ່​ສຸດ ຄຳ​ວ່າ​: “ຖືກ​ຕ້ອງ​” ກໍ​ຕ້ອງ​ເຂົ້າ​ໃຈວ່​າ “ຄິດ​ດີຄິດຖືກຄິດ​ຊອບ ເວົ້າ​ດີເວົ້າ​ຖືກ​ເວົ້າ​ຊອບ ທຳ​ດີ​ທຳ​ຖືກ​ທຳ​ຊອບ” ຈາກ​ນີ້​ແລ້ວຕ້ອງ​ຮູ້​ຈັກ​ອ່ອນ​ໂຍນ​ລົງ​ໃສ່​ຜູ່ອື່ນ ຕ້ອງ​ຮູ້​ຈັກ​ນອບ​ນ້ອມ​ໃສ່​ຕົນ​ໃສ່​ຜູ່​ອື່ນ ແລະ​ຕ້ອງ​ຮູ້​ຈັກ​ໃຊ້​ມາ​ລະ​ຍາດພ້ອມ​ທັງ​ຄຸນ​ສົມ​ບັດ​ເຈົ້າ​ຂອງ ແລະ ​ຕ້ອງ​ປະ​ກອບ​ການ​ວາງ​ທ່າ​ທີໃຫ້​ຖືກ​ໃຫ້​ເໝາະ​ສົມ ແລະ​ຕ້ອງ​ຮູ້​ຈັກ​ການ​ນຸ່ງ​ຫົ່ມການ​ຕົບ​ແຕ່ງ ນັບແຕ່​ເສີມ​ແຕ່ງ​ໃຫ້​ສວຍ​ໃຫ້​ງາມກໍ​ຕ້ອງ​ຮູ້ ກໍ​ຕ້ອງ​ເຂົ້າ​ໃຈ ເຂົ້າ​ໃຈວ່​າ​ເໝາະ​ສົມ ຫຼື​ບໍ່​ເໝາະ​ສົມສຳ​ລັບ​ເຈົ້າ​ຂອງ ເຂົ້າ​ກັບ​ເຈົ້າ​ຂອງຫຼື​ບໍ່​ເຂົ້າ​ກັບ​ເຈົ້າ​ຂອງ ທ່າ​ທີ​ດີ​ບໍ່​? ບົດ​ບາດ​ດີ​ບໍ່​? ຕ້ອງ​ເຈັຍ​ລະ​ນັຍຕ້ອງ​ໄຈ້​ແຍກ ໄຈ້​ແຍກ​ເບິ່ງ​ຕື່ມ​ອີກ ໄຈ້​ແຍກ​ເບິ່ງ​ຄັກໆ ເພື່ອ​ໃຫ້​ເຫັນ​ເຈົ້າ​ຂອງຢ່າງ​ລະ​ອຽດ ​ໃນ​ສ່ວນ​ຕາ​ແນມ​ເຫັນ ໃນຄວາມ​ຮັບ​ຮູ້​ທາງ​ຕາ

 

7.)

ຕ້ອງ​ເຫັນ​ວ່າເຈົ້າ​ຂອງ​ມີ​ສະ​ຕິ​ຫຼາຍ​ປານ​ໃດ​? ມີ​ຄວາມ​ລະ​ນຶກມີ​ຄວາມ​ຮູ້​ສຶກ​ຕົວຄ່ອງ​ແຄ້ວ​ວ່ອງ​ໄວ​ສ່ຳໃດ​? ຄຸມ​ສະ​ຖາ​ນະ​ການ​ໄດ້​ຫຼາຍ​ສ່ຳ​ໃດ​? ຢູ່​ກັບ​ເຈົ້າ​ຂອງຫຼື​ໄປ​ຕາມ​ຄົນ​ອື່ນ​? ເວລາ​ເຈິ​ເຫດ​ການ ຢັບ​ຢັ້ງ​ເຈົ້າ​ຂອງ​ໄດ້​ຫຼາຍ​ປານ​ໃດ​? ໄດ້​ຈັກ​ເປີ​ເຊັນ​? ຕັ້ງ​ໝັ້ນ​ທຸ່ນ​ທ່ຽງຈັກ​ເປີ​ເຊັນ​? ມີ​ຄວາມ​ປົກ​ກະ​ຕິຈັກ​ເປີເຊັນ​? ຄິດ​ອອກ​ໃນ​ທາງ​ແກ້​ໄຂໄດ້​ຈັກ​ເປີ​ເຊັນ​? ດັບ​ເຫດ​ລົງ​ໄດ້​ຈັກ​ເປີ​ເຊັນ​? ຕັດ​ຮອນ​ໄດ້​ຫຼາຍ​ປານ​ໃດ​? ຈັດ​ຈ້ອນ​ໄດ້​ຫຼາຍ​ປານ​ໃດ​? ຈັດ​ຈ້ອນ​ເຂົ້າເພື່ອ​ໃຫ້​ເຫັນ​ເຈົ້າ​ຂອງ​ຜິດຫຼື​ເຈົ້າ​ຂອງ​ຖືກ​? ຜູ່​ອື່ນ​ຜິດຫຼື​ຜູ່​ອື່ນຖືກ​? ຜິດ​ໜ້ອຍຫຼື​ຜິດ​ຫຼາຍ​? ຖືກ​ໜ້ອຍຫຼື​ຖືກ​ຫຼາຍ​? ເປັນ​ແນວ​ໃດ​? ເບິ່ງ​ທີ່​ຫົວ​ໃຈ​ເຈົ້າ​ຂອງເຫັນ​ວ່າເປັນ​ແນວ​ໃດ​? ເບິ່ງ​ດ້ວຍ​ຕີ​ລາ​ຄາ​ຊັ່ງ​ຊາ ວ່າ​ເຈົ້າ​ຂອງ​ຮອງ​ຮັບ​ເຈົ້າ​ຂອງ​ໄດ້ຫຼື​ຍັງ​? ຖ້າ​ໄດ້ ໄດ້​ຈັກ​ເປີເຊັນ​? ປ້ອງ​ກັນ​ເຈົ້າ​ຂອງ​ໄດ້​ຫຼາຍ​ປານ​ໃດ​? ເຈົ້າ​ຂອງ​ຢູ່​ກັບ​ເຈົ້າ​ຂອງ​ຫຼາຍ​ປານ​ໃດ​? ລະ​ນຶກ​ຮູ້​ສຶກ​ໄດ້​ດີ​ບໍ່​? ຫຼື​ວ່າ​ອາ​ການ​ວຸ້ນ​ວາຍ​ເກີດ​ຂຶ້ນ​ຢ່າງ​ດຽວ ຫຼື​ວ່າ​ຄວາມ​ຟຸ້ງ​ຊ້ານ​ລຳ​ຄານ​ເກີດ​ຂຶ້ນ ຈົນ​ຄຸມ​ເຈົ້າ​ຂອງ​ບໍ່​ໄດ້ ຫຼື​ວ່າຄວາມ​ຫງອຍ​ເຫງົາ​ເສົ້າ​ຊຶມເກີດ​ຂຶ້ນ​ ແລ້ວ​ລອຍ​ໄປ​ຕາມ ຕ້ອງ​ເຫັນ ຕ້ອງ​ເຫັນ​ໃນ​ແງ່​ນີ້ ຖ້າ​ເຫັນ​ຈິ່ງ​ຈະ​ຮູ້​ເຈົ້າ​ຂອງ ຈິ່ງ​ຈະ​ຈັກ​ເຈົ້າ​ຂອງ ຈິ່ງ​ເອີ້ນ​ໄດ້​ວ່າ​: “ເປັນ​ຜູ່​ຮູ້ ເປັນ​ຜູ່​ເຫັນ​ຕົນ​ເອງ​”

 

8.)

ຈົ່ງ​ຮູ້​ຈັກ​ສຳ​ລວມ​ລະ​ວັງ ທີ​ແລກ​ຕ້ອງ​ສັງ​ລວມ​ກາຍ ວາ​ຈາ ໃຈ​, ຕໍ່​ໄປ​ອີກ ຕ້ອງ​ຮູ້​ຈັກ​ສັງ​ລວມ​ຕາ ຫູ ດັງ ລີ້ນ ກາຍ ໃຈ ແລະ​ວັດ​ເບິ່ງ​ຄວາມ​ຂ້ອງ​ຄາ ວັດ​ເບິ່ງ​ຕາ​ຍັງ​ຂ້ອງ​ຍັງ​ຄາ​ບໍ່​? ຫູ​ຍັງ​ຂ້ອງ​ຍັງ​ຄາ​ບໍ່​? ດັງ​ຍັງຂ້ອງ​ຍັງ​ຄາ​ບໍ່​? ລີ້ນ​ຍັງ​ຂ້ອງ​ຍັງ​ຄາ​ບໍ່​? ກາຍ​ຍັງ​ຂ້ອງ​ຍັງ​ຄາ​ບໍ່​? ໃຈ​ຍັງ​ຂ້ອງ​ຍັງ​ຄາ​ບໍ່​? ເບິ່ງ 6 ທາງ​ນີ້​ໃຫ້ຄັກໆ​! ເບິ່ງ​ແລ້ວຈິ່ງ​ເບິ່ງ​ໄປ​ເຖິງ​ຮູບ​ທີ່​ແນມ​ເຫັນ ຮູບ​ອັນ​ໃດ​ກໍ​ຕາມ ທີ່​ສາຍ​ຕາ​ແນມ​ເຫັນ ເຫັນ​ແລ້ວມັນເປັນ​ແນວ​ໃດ​? ຕ້ອງ​ວັດ​ເບິ່ງ​ຜົນ​ອີກ ວັດ​ເບິ່ງ​ແລ້ວ​ຕ້ອງ​ໃຫ້​ຮູ້​ຈັກ​ວ່າ ຮູບ​ນັ້ນໆຮູບ​ນີ້ໆ ເຂົ້າ​ມາ​ເຕັງ​ຫົວ​ໃຈເຈົ້າ​ຂອງ​ໄດ້ຫຼື​ບໍ່​? ຖ້າ​ໄດ້ ໄດ້​ຈັກ​ເປີ​ເຊັນ​? ຕ້ອງ​ຮູ້​ເຖິງ​ຂະ​ໜາດ​ນີ້ ທັງ​ສຽງ​ກໍ​ຄື​ກັນ ທັງ​ກິ່ນ​ກໍ​ຄື​ກັນ ທັງຣົ​ສອາ​ຫານ​ກໍ​ຄື​ກັນ ທັງ​ເຢັນ​ຮ້ອນ​ອ່ອນ​ແຂງ​ກໍ​ຄື​ກັນ ທັງ​ແນວ​ຄິດ​ກໍ​ຄື​ກັນ ຕ້ອງ​ເບິ່ງ ​ຕ້ອງເອົາ​ປັນ​ຍາ​ເບິ່ງ​! ສິ່ງເຫຼົ່າ​ນີ້​ເຂົ້າ​ມາ​ໜີບ​ເຕັງ​ເຈົ້າ​ຂອງ​ຫຼາຍ​ປານ​ໃດ​? ໃນ​ແຕ່​ລະ​ຄັ້ງ​ລະ​ຄັ້ງ​ລະ​ຄັ້ງ ແຕ່​ລະ​ມື້​ລະ​ວັນ ຕ້ອງ​ເບິ່ງ ຖ້າມີ ກໍ​ຕ້ອງ​ກວາດ​ອອກດ້ວຍ​ປັນ​ຍາ​ເຈົ້າ​ຂອງ ຕ້ອງ​ໃຊ້​ປັນ​ຍາກ​ວາດ​ອອກ ກວາດ​ອອກ​ຈາກ​ຫົວ​ໃຈ​ເຈົ້າ​ຂອງ ຫົວ​ໃຈ​ເຈົ້າ​ຂອງ​ຈິ່ງ​ຈະ​ວ້າງ ຈິ່ງ​ຈະ​ມີ​ທີ່​ຮອງ​ຮັບ​ພຣະ ຕ້ອງ​ເບິ່ງ​ແບບ​ນີ້ ຕ້ອງ​ເຫັນ​ແບບ​ນີ້ ຕ້ອງ​ຮູ້​ຈັກ ຕ້ອງ​ຮູ້​ຈັກ​ເຖິງ​ເລື້ອງ​ນີ້ ເລື້ອງ​ທີ່​ເຂົ້າ​ມາ​ຜູກມາ​ມັດ​ເອົາ​ເຈົ້າ​ຂອງ ເລື້ອງ​ທີ່​ເຂົ້າ​ມາ​ຕາມ​ອຳ​ນາດ​ຂອງ​ສິ່ງນັ້ນໆ ຂອງ​ສິ່ງ​ນີ້ໆ ໂດຍ​ມີ​ອຳ​ນາດ​ທັງ​ນັ້ນ ຕ້ອງ​ເຫັນ​ອີກ​ວ່າ​ຈັກ​ເປີ​ເຊັນ ທີ່​ຖືກ​ອຳ​ນາດ​ບຽດ​ບຽນ​ຄອບ​ງຳ​? ຫຼື​ບໍ່​ມີກໍ​ໃຫ້​ເຫັນ ໃຫ້​ເຫັນ​ຄັກໆ ຖ້າ​ເຫັນ​ຈິ່ງ​ແມ່ນ​ຮູ້​ເຈົ້າ​ຂອງ​ຄັກ ຮູ້​ເຈົ້າ​ຂອງ​ແທ້ໆ ຮູ້​ເຈົ້າ​ຂອງ​ຈິງໆ ຮູ້ແລ້ວ​ຈິ່ງ​ຈະ​ແຈ້ງ ຈິ່ງ​ຈະ​ສະ​ຫວ່າງ​ຂຶ້ນ ສະ​ຫວ່າງ​ດ້ວຍຄວາມ​ຮູ້​ແຈ້ງ​ຂອງ​ເຈົ້າ​ຂອງ ແບບ​ນີ້​ຈິ່ງ​ເອີ້ນ​ໄດ້​ວ່າຜູ່​ປະ​ຕິ​ບັດ​ຖືກ ຖືກ​ຕາມ​ພຣະ​ອົງ​ຄ໌ ພຣະ​ອົງ​ຄ໌​ປະ​ສົງ ພຣະ​ອົງ​ຄ໌ ​ຜູ່​ເປັນ​ຈິດ​ປະ​ສົງ​ແນວ​ນີ້ ຖື​ວ່າ​ເອົາ​ຫຼັກການມາ​ນຳ​ໃຊ້​ຢ່າງ​ແທ້​ຈິງ ເອົາ​ວິ​ທີ​ແນວ​ທາງເຂົ້າ​ມາ​ຊ່ວຍ​ເຈົ້າ​ຂອງ​ແທ້ ຖື​ວ່າ​ຝຶກ​ເພື່ອ​ຮູ້​ໂຕ​ເຈົ້າ​ຂອງ ຮູ້​ກາຍຮູ້​ໃຈ ຮູ້​ການ​ເວົ້າຮູ້​ການ​ຄິດ ຮູ້​ການ​ກະ​ທຳ ແບບ​ນີ້​ຈິ່ງ​ເອີ້ນ​ໄດ້​ວ່າ ຜູ່​ຮູ້​ຈັກ​ວິ​ທີ​ແນວ​ທາງ ​ຢ່າງ​ແທ້ຈິງ​!

ຂໍ້​ທີ 9:

ການ​ຝຶກ​ການ​ປະ​ຕິ​ບັດ ​ຕ້ອງ​ເຂົ້າ​ໃຈວ່​າເພື່ອ​ເຈົ້າ​ຂອງ ແລະ​ເພື່ອ​ຜູ່​ອື່ນ ແລະ​ເພື່ອ​ທຸກໆ​ໝູ່​ສັດ ທີ່​ຢູ່​ໃນໂລກ​ໜ່ວຍ​ນີ້​ນຳ​ກັນ ຕ້ອງ​ເຂົ້າ​ໃຈ​ແບບ​ນີ້ ແລະ​ຕ້ອງ​ເຂົ້າ​ໃຈວ່​າເພື່ອ​ຄວາມ​ຫຼຸດ​ພົ້ນ ແລະ​ຕ້ອງ​ເຂົ້າ​ໃຈອີກ​ວ່າເພື່ອ​ດັບ​ທຸກ​ຂ໌ ເພື່ອ​ໃຫ້​ພົ້ນ​ຈາກ​ທຸກ​ຂ໌ ບໍ່​ແມ່ນ​ເພື່ອ​ສູດເພື່ອ​ເສດ ແລະ ບໍ່​ແມ່ນ​ເພື່ອ​ຕ້ອງການ​ເປັນ​ນັ້ນ ເພື່ອຕ້ອງ​ການ​ເປັນ​ນີ້ ແລະ​ບໍ່​ແມ່ນ​ເພື່ອ​ເຫາະ​ເຫີນ​ເດີນ​ອາ​ກາດ ທັງ​ບໍ່​ແມ່ນ​ໃນ​ເລື້ອງ​ນີ້ ທັງ​ຍັງ​ບໍ່​ແມ່ນ​ເພື່ອ​ເອົາ ປະຕິ​ບັດ​ບໍ່​ແມ່ນ​ເພື່ອ​ເອົາ ຕ້ອງ​ເຂົ້າ​ໃຈວ່​າ​ເພື່ອ​ໃຫ້​ຢ່າງ​ດຽວ ແຕ່​ວ່າ​ຖ້າ​ມີ​ຜູ່​ສັທ​ທາ​ຂຶ້ນ​ມາ ຖ້າ​ມີ​ຜູ່​ເຫຼື້ອມ​ໃສ ຖ້າ​ມີຜູ່​ຮູ້ຖ້າ​ມີ​ຜູ່​ເຂົ້າ​ໃຈ ເກີດ​ມີ​ຄວາມ​ພໍ​ໃຈ​ດ້ວຍ​ສະ​ຕິ​ປັນ​ຍາ​ແລ້ວ ຢາກ​ຖວາຍ​ກໍ​ດີບໍ່​ຢາກ​ຖວາຍ​ກໍ​ດີ ໄດ້​ອັນ​ໃດໃຫ້​ກໍ​ດີບໍ່​ໄດ້​ກໍ​ດີ ເພາະ​ວ່າ​ການ​ຮັບ​ຂອງ​ນຳ​ຄົນ​ອື່ນເປັນ​ການ​ທຸກ​ຂ໌​ຊະ​ນິດ​ນຶ່ງ ເພາະ​ວ່າ​ຮັບ​ແລ້ວຕ້ອງ​ເປັນ​ຜູ່​ຕິດ​ໜີ້​ ຜູ່​ເຫັນ​ຄຸນ​ຜູ່​ເຫັນ​ໂທດ ຕ້ອງ​ເຂົ້າ​ໃຈວ່​າ​ມີ​ໜີ້ ແຕ່​ລະ​ສິ່ງ​ແຕ່​ລະ​ຢ່າງເປັນ​ສິ່ງ​ທີ່​ມີ​ເຈົ້າ​ຂອງ ເຈົ້າ​ຂອງ​ຂອງ​ເຂົາຄື​ເຈົ້າ​ໂລກ​ໜ່ວຍ​ນີ້ ແຕ່​ລະ​ສິ່ງ​ແຕ່​ລະ​ຢ່າງກໍ​ມີ​ເຈົ້າ​ຂອງ ເຈົ້າ​ຂອງ​ທາງ​ຕາ​ແນມ​ບໍ່​ເຫັນ ຖ້າ​ຫາກ​ວ່າ​ບໍ່​ເຂົ້າ​ໃຈ ຈະ​ຖືກ​ເຈົ້າ​ໂລກ​ໜ່ວຍ​ນີ້ຜູກ​ເອົາ​ ຜູ່​ຮັບ​ອາດ​ຈະ​ໜັກ​ກໍ​ໄດ້ ຖ້າ​ຫາກ​ວ່າ​ຜູ່​ຮັບບໍ່​ມີ​ບຸນ​ສົ່ງ​ໃຫ້ ຫຼືຖ້າ​ຫາກ​ວ່າ ຂາດ​ການ​ພິ​ນິດ​ພິ​ຈາ​ຣະ​ນາ ບໍ່​ແມ່ນ​ເວົ້າ​ເລື້ອງ​ເອົາ ເວົ້າ​ພຽງ​ແຕ່​ເລື້ອງ​ຮັບ ຮັບ​ຈາກ​ຜູ່​ສັທ​ທາກໍ​ຍັງ​ໜັກ​ຢູ່​ແລ້ວ ໜ້າ​ຢ້ານ​ທີ່​ສຸດ ໜ້າ​ສົງ​ສານ​ເຈົ້າ​ຂອງ​ທີ່​ສຸດໃນ​ເວລາ​ຮັບ​ຂອງ​ຈາກ​ຄົນ​ອື່ນ ຈາກ​ບຸກ​ຄົນ​ອື່ນ ອາດ​ຈະ​ເປັນ​ແພະ​ຮັບ​ບາບ​ກໍ​ໄດ້ ອາດ​ຈະ​ເປັນ​ໂທດ​ກໍ​ໄດ້ ຖ້າ​ຫາກ​ວ່າ​ບໍ່​ມີ​ບຸນ​ພຽງ​ພໍທີ່​ຈະ​ຕອບ​ແທນ​ຄືນ ອາດ​ຈະ​ຖືກ​ວັດ​ຖຸ​ສິ່ງ​ຂອງ ຫຼື​ກ້ອນ​ຊັ​ພ​ອັນ​ໃດອັນ​ນຶ່ງ ທັບ​ເຈົ້າ​ຂອງ​ເຕັງ​ເຈົ້າ​ຂອງ ເຕັງ​ຫົວ​ອົກ​ຫົວ​ໃຈ​ເຈົ້າ​ຂອງ ເຕັງ​ສະ​ໝອງເຕັງ​ປະ​ສາດ ເຕັງ​ໄປ​ທົ່ວ​ທຸກໆລະ​ບົບ ເຕັງ​ຄື້ນ​! ໂອ້ຍ! ເວົ້າ​ແລ້ວ​ໜ້າ​ສົງ​ສານ! ໜ້າ​ສົງ​ສານ​ເຈົ້າ​ຂອງ! ແຕ່​ວ່າ​ຫຼີກ​ລ້ຽງ​ບໍ່​ໄດ້ກໍ​ຕ້ອງ​ໄດ້​ຮັບ​, ແຕ່​ຖ້າ​ວ່າ​ຮັບ​ແທ້​ຮັບ​ຈິງ ຮັບ​ແບບ​ພຣະ​ພຸ​ທ​ທະ​ສາ​ສ​ນາ​ຮັບ ກໍ​ບໍ່​ດ່າງກໍ​ບໍ່​ພ້ອຍ ແລະ​ຮັບ​ແບບ​ຜູ່​ມີ​ສະ​ຕິ​ປັນ​ຍາຮັບ​ກໍ​ທຳ​ມະ​ດາ ເພາະ​ຮັບ​ເອົາ​ໄວ້ ຮັບ​ແລ້ວ​ກໍ​ເອົາ​ໄປ​ຕາມ​ຄວາມ​ເໝາະ​ສົມ ເອົາ​ໄປ​ຕາມ​ພຣະ​ທັມ​ຈັດ​ສັນ ແບບ​ນີ້​ການ​ຮັບ​ຂອງ​ຈາກ​ຜູ່​ຖວາຍ ຖ້າ​ຜູ່​ຖວາຍ​ເຈາະ​ຈົງ​ໃຫ້​ໃຊ້​ສ່ວນ​ຕົວ ໃຫ້​ໃຊ້​ຕາມ​ໃຈ ໃຫ້​ໃຊ້​ຕາມ​ຄວາມຕ້ອງ​ການ​ຢາກ​ໃຊ້ ໃຫ້​ໃຊ້​ແບບ​ຄວາມ​ເຫັນ​ຂອງ​ເຈົ້າ​ຂອງ​ຢາກ​ໃຊ້ ໃຫ້​ໃຊ້​ແບບ​ຕາມ​ເຈົ້າ​ຂອງ​ເຫັນ​ວ່າ​ຖືກເຫັນ​ວ່າ​ຄວນ ໃຫ້​ໃຊ້​ແບບ​ຕາມ​ອັດ​ທະ​ຍາ​ໃສ ແບບ​ນີ້​ກໍ​ພໍ​ໄຄບໍ່​ໜັກ​ປານ​ໃດ ແລະ​ບໍ່​ເປັນ​ໂທດ ບໍ່​ເປັນ​ບາບບໍ່​ເປັນ​ກັມ ບໍ່​ເປັນ​ເວນ ບໍ່​ເປັນ​ເຄາະບໍ່​ເປັນ​ຊວຍ ແຕ່​ວ່າ​ຕ້ອງ​ຄຸ້ມ​ກັນ ຕ້ອງ​ຄຸ້ມ​ກັນ​ທີ່​ສຸດ ຕ້ອງ​ພິ​ນິດ​ຕ້ອງ​ພິ​ຈາລະ​ນາ​ຫຼາຍໆ​ຄັ້ງ ໃຫ້​ຫຼາຍ​ທີ່​ສຸດ ເພື່ອ​ເຈົ້າ​ຂອງ​ເຂົາ​ຈະ​ພໍ​ໃຈ ແຕ່​ລະ​ສິ່ງ​ແຕ່​ລະ​ຢ່າງ​ຈະ​ມີ​ຄວາມ​ພໍ​ໃຈ ແຕ່​ລະອັນ​ແຕ່​ລະ​ແນວ​ຈະ​ຊື່ນ​ອົກ​ຊື່ນ​ໃຈ ຍ້ອນ​ວ່າ​ຜູ່​ຮັບ​ບໍ່​ເຮັດ​ໃຫ້​ເສື່ອມ ເຖິງ​ຂະ​ໜາດ​ນີ້

 

 

ເວົ້າ​ເຖິງ​ທາງ​ລັດ ກໍ​ເປັນເລື້ອງ​ເວົ້າ​ຍາກ ແຕ່​ວ່າ​ຖ້າ​ເຂົ້າ​ໃຈ ຖ້າ​ທຳ​ຕາມ​ໄດ້ ຖ້າ​ເອົາ​ໃຈ​ໃສ່ ​ຕ້ອງ​ໄດ້​ຜົນ​ໄວ​ຂຶ້ນ ຕ້ອງ​ໄດ້​ຜົນ​ຂຶ້ນ​ມາ​ແບບງ່າຍ​ຂຶ້ນ ຕ້ອງ​ໄດ້​ຜົນ​ແບບ​ກະ​ທັດ​ລັດ ຕ້ອງ​ໄດ້​ຜົນ​ແບບ​ງ່າຍ ງ່າຍ​ຈົນ​ບໍ່​ໜ້າ​ເຊື່ອ​ພຸ້ນ​ແລ້ວ ສິ່ງ​ສຳ​ຄັນ​ທີ່​ສຸດກໍ​ຄື​ອີກ 5 ຂໍ້​:

 

1.

ຕ້ອງ​ປ່ອຍ​ວາງ ຕ້ອງ​ປ່ອຍ​ວາງ​ເປັນ ແລະ​ປ່ອຍ​ວາງ​ໃຫ້​ເປັນ ເວົ້າ​ຊ້ຳ​ແບບ​ນີ້​ກໍ​ຍັງ​ຟັງ​ຍາກ​ຢູ່​ແລ້ວ ເປັນຫຍັງ​ຈິ່ງ​ເວົ້າ​ຊ້ຳ​? ເວົ້າ​ຊ້ຳ​ເພາະ​ “ວາງ” ມີ​ຫຼາຍ​ວາງ

 

2.

ຕ້ອງ​ເຫັນ​ວ່າ “​ສັນ​ເສີນ” ກໍ​ພຽງ​ແຕ່​ສຽງ, “ນິນ​ທາ” ​ກໍ​ພຽງ​ແຕ່​ສຽງ, “ດີ​ໃຈ​ເສັຍ​ໃຈ” ​ກໍ​ພຽງ​ແຕ່​ຄວາມ​ຮູ້​ສຶກ, “ຮັກ​ຊັງ” ກໍ​ພຽງ​ແຕ່​ຄວາມ​ຮູ້​ສຶກ, “ສຸ​ຂ​ທຸກ​ຂ໌​” ກໍ​ພຽງ​ແຕ່​ຄວາມ​ຮູ້​ສຶກ, ຮູ້​ສຶກ​ສຸ​ຂຮູ້​ສຶກ​ທຸກ​ຂ໌​ເທົ່າ​ນີ້​ເອງ ຕ້ອງ​ເຫັນ​ແບບແຍກ​ໃຫ້​ລະ​ອຽດ ລະ​ອຽດ​ຕື່ມ​ອີກ ເພາະ​ວ່າ​ເປັນ​ຊັ້ນ​ລະ​ອຽດ​ແລ້ວ ເອົາ​ຄວາມ​ຮູ້​ສຶກ​ເຈົ້າ​ຂອງ​ອອກ​ມາພິ​ຈາ​ລະ​ນາ​ແລ້ວ

 

3.

ຕ້ອງ​ໃຫ້​ເຫັນ​ວ່າ​ຜູ່​ທີ່​ເວົ້າ​ໃຫ້ ຜູ່​ທີ່​ຫາ​ເລື້ອງ​ໃສ່ ຜູ່​ທີ່​ສ້າງ​ເລື້ອງ​ເຂົ້າ​ມາ​ທັບ​ເຂົ້າ​ມາ​ເຕັງ​ເຈົ້າ​ຂອງ ພ້ອມ​ທັງ​ຜູ່ ທີ່​ຈົງ​ໃຈ​ທຳ​ລາຍ​ເຖິງ​ທີ່​ສຸດ ແລະ​ຜູ່​ທີ່​ພະ​ຍາ​ຍາມ​ຢາກ​ຂ້າ​ເຈົ້າ​ຂອງ ໃນ​ວິ​ທີ​ໃດ​ກໍ​ຕາມ ໃຫ້​ເຫັນ​ວ່າ​ຜູ່​ນີ້ບຸກ​ຄົນ​ນີ້ ແລະ​ພວກ​ນີ້ໝູ່​ຊຸມ​ນີ້ ຂະ​ບວນ​ການ​ຊຸມ​ນີ້ ຝ່າຍ​ນີ້​ເປັນ​ຝ່າຍ​ໃຫ້​ບາ​ລະ​ມີ ເປັນ​ຝ່າຍ​ສະ​ໜັບສະ​ໜູນ ​ໃຫ້​ເຈົ້າ​ຂອງເອົາ​ຄວາມ​ອົດ​ທົນ​ຂຶ້ນ​ມາ ແລະ​ເອົາ​ຄວາມ​ພາກ​ພຽນ​ພະ​ຍາ​ຍາມ ພ້ອມ​ທັງ​ເອົາຄວາມ​ອົດ​ກັ້ນ​ມາ​ນຳ​ໃຊ້ ແລະ ​ໃຫ້​ເອົາ​ການ​ຕັດ​ສິນ​ໃຈ ແບບ​ປ່ອຍ​ວາງ​ຂັ້ນ​ສຸດໆມາ​ນຳ​ໃຊ້​, ວາງ​ເທົ່າ​ໃດໃຈ​ກໍ​ຍິ່ງ​ແຫ່ງ​ວ້າງ, ວາງ​ເທົ່າ​ໃດໃຈ​ກໍ​ຍິ່ງ​ເບົາ ວາງ​ເທົ່າ​ໃດໜີ້​ເຈົ້າ​ຂອງກໍ​ຍິ່ງ​ເໝິດ​ເທົ່າ​ນັ້ນ ຍິ່ງ​ເໝິດອອກ​ຈາກ​ຫົວ​ໃຈ​, ຍິ່ງ​ກ້ຽງ ໃນ​ເມື່ອ​ກ້ຽງ​ເໝິດ​ແລ້ວ ບາບ​ກັມ​ຝ່າຍພວກ​ອະ​ກຸ​ສົນກໍ​ເລີຍ​ບໍ່​ເຫຼືອ ຖື​ວ່າ​ໄດ້ຂະ​ບວນ​ການ​ຝ່າຍ​ທີ່​ເຈົ້າ​ຂອງ​ບໍ່​ປາ​ຖະ​ໜາ ມາກ​ວາດ​ລ້າງຊ່ວຍ​ລ້າງ​ຫົວ​ໃຈ​ເຈົ້າ​ຂອງ

 

4.

ໃຫ້​ຮູ້​ຈັກ​ຂອບ​ພຣະ​ຄຸນນຳ​ຜູ່​ທີ່​ເຂົ້າ​ມາ​ຊ່ວຍ ໃຫ້​ຮູ້​ຈັກ​ບຸນ​ຄຸນ ແລະ ​ໃຫ້​ຮູ້​ຈັກ​ຕອບ​ແທນ​ພຣະ​ຄຸນ ດ້ວຍການ​ສົ່ງ​ບຸນ​ໃຫ້ ດ້ວຍ​ການ​ອະ​ນຸ​ໂມ​ທະ​ນາ​ບຸນ​ໃຫ້ ແລະ​ອຸ​ທິດ​ບຸນ​ໃຫ້​ເຈົ້າ​ໜີ້ ພວກ​ຝ່າຍ​ເຈົ້າໜີ້​ຈິ່ງ​ຊິ​ພໍ​ໃຈ ພໍ​ໃຈ​ນຳ​ລູກ​ໜີ້ ພໍ​ໃຈ​ແບບ​ເຕັມ​ອົກ​ເຕັມ​ໃຈ ໃນ​ເມື່ອ​ຝ່າຍ​ເຈົ້າ​ໜີ້ໄດ້​ຮັບ​ໜີ້​ທັງ​ເໝິດ​ແລ້ວ ແນ່​ນອນ​ຕ້ອງ​ພາກັນ​ຖອນ​ທັບ​ອອກ ຖອນ​ອອກ​ຈາກ​ຫົວ​ໃຈຖອນ​ອອກ​ຈາກ​ທຸກໆ​ລະ​ບົບ ນີ້​ເປັນ​ວິ​ທີ​ການ ວິ​ທີ​ການ​ຊ່ວຍເຈົ້າ​ຂອງ ແລະ​ຊ່ວຍ​ຜູ່​ອື່ນ ຂໍ​ໃຫ້​ຜູ່​ຖາມ​ຈົ່ງ​ເຂົ້າ​ໃຈ​ຕາມ​ນີ້ ນີ້​ຄືທາງ​ລັດ​! ຢາກ​ເດີນ​ທາງ​ລັດຕ້ອງ​ຮູ້​ຈັກຈັດ​ຈ້ອນ ຕ້ອງ​ຮູ້​ຈັກ​ຂອບ​ພຣະ​ຄຸນ​ນຳ​ພວກ​ທີ່​ເຂົາ​ມາ​ທວງ​ໜີ້ ໜີ້​ບໍ່​ສ້າງ​ສາ​ມາດ​ເໝິດ​ໄດ້​! ໜີ້​ບໍ່​ກໍ່ ສາ​ມາດສູນ​ສ້ຽງ​ໄປ​! ຢາກ​ສັ້ນ​ໃຫ້​ຕັດ ຢາກ​ຍາວ​ໃຫ້​ຕໍ່, ໃຜ​ຜູ່​ມັກ​ຕໍ່ ຕ້ອງ​ໄດ້​ກັມ​ຕະ​ຫຼອດ​ໄປ​! ຕ້ອງ​ໄດ້​ບາບຕ້ອງ​ໄດ້​ເວນ ຕ້ອງ​ໄດ້​ເຄາະຕ້ອງ​ໄດ້​ຊວຍ ມາ​ເປັນ​ທີ່​ຮອງ​ຮັບ​ເຈົ້າ​ຂອງ ຕ້ອງ​ໄດ້​ພວກ​ໝູ່​ມານ​ທັງ​ຫຼາຍມາ​ເປັນມິຕ​ເປັນ​ເພື່ອນ ແລະ​ຕ້ອງ​ໄດ້ພໍ່​ມານ​ແມ່​ມານ​ມາ​ຄອບ​ງຳ​ເຈົ້າ​ຂອງ

 

5.

ຕ້ອງ​ພໍ​ໃຈ​ໃນ​ເລື້ອງ​ທີ່​ເກີດ​ຂຶ້ນ ຈະ​ເປັນ​ເລື້ອງ​ໄດ້​ຈ​ະ​ເປັນ​ເລື້ອງ​ເສັຍ​ກໍ​ຕາມ ເອົາ​ຄວາມ​ພໍ​ໃຈ​ຮັບ​ໄວ້​ກ່ອນ ຢ່າ​ທັນ​ວ່າ​ຜິດ ຢ່າ​ທັນ​ວ່າ​ຖືກ​! ຢ່າ​ທັນ​ວ່າ​ໄດ້ ຢ່າ​ທັນ​ວ່າ​ເສັຍ! ຢ່າ​ທັນ​ວ່າ​ແມ່ນ​ ຢ່າ​ທັນ​ວ່າ​ບໍ່​ແມ່ນ​! ໃຫ້​ເຫັນ​ວ່າ​ໂຊກ​ກຳ​ລັງ​ເຂົ້າ​ມາ​ຫາ​ເຈົ້າ​ຂອງ ຕ້ອງ​ເຫັນ​ວ່າ​ບຸນ​ກຳ​ລັງ​ມາ​ຮອດ ຕ້ອງ​ເຫັນ​ວ່າ​ຄູ​ອາ​ຈານ​ກຳ​ລັງ​ເຂົ້າ​ມາ​ສອນ ຕ້ອງ​ເຫັນ​ວ່າ​ກຳ​ລັງ​ປະ​ສົບ​ພົບ​ພໍ້​ບົດ​ຮຽນອັນ​ລ້ຳ​ຄ່າ ຕ້ອງ​ເຫັນ​ວ່າ​ວິ​ຊາ​ເລີດ​ຍິ່ງ​ເຂົ້າ​ມາ​ໃນ​ຊີ​ວິດ ຖ້າ​ເຫັນ​ແບບ​ນີ້ ພິດ​ສົງ ແລະ​ພິດ​ພັຍທັງ​ຫຼາຍ​ທັງ​ປວງ ທັງ​ເໝິດ​ທັງ​ສິ້ນຈະ​ສູນ​ຫາຍ​ໄປ ຕ້ອງ​ເອົາ​ຮອຍ​ຍິ້ມ​ປະ​ກອບ​ເຂົ້າ​ຕື່ມ ຍິ້ມ​ຮັບ​ແຕ່​ລະ​ເລື້ອງ​ລະ​ເລື້ອງ ເພື່ອ​ບໍ່​ໃຫ້​ມີ​ບັນ​ຫາ​ຄາ​ໃຈ ພ້ອມ​ດ້ວຍ​ບອກ​ເຈົ້າ​ຂອງ​ວ່າຍິ້ມ​ຮັບ​ໂຊກ ເຈົ້າ​ຂອງ​ຈະ​ໂຊກ​ດີ​ຕະຫຼອດ​ໄປ ໜ້າ​ບູດ​ໜ້າ​ໄຄ່​ກຳ​ຈັດ​ອອກ ໃຈ​ວຶດ​ວື່​ກຳຈັດ​ອອກ ໃຈ​ນ້ອຍ ໃຈ​ອ່ອນ​ແອ​ທໍ້​ແທ້​ກຳ​ຈັດ​ອອກ ໃຈຂຶ້ນໆ​ລົງໆຕ້ອງ​ຢັບ​ຢັ້ງ​ໄວ້ ໃຈ​ອອກ​ຊ້າຍອອກ​ຂວາ​ຕ້ອງ​ດຶງ​ເຂົ້າ​ມາ​ໃສ່​ຫົນ​ທາງ ຖ້າ​ຫາກ​ວ່າ​ໃຈ​ຈະ​ເກີດໂມ​ໂຫ​ໂທ​ສາ ກໍ​ໃຫ້​ບອກ​ເຈົ້າ​ຂອງວ່າ​: “ຜີ​ມານ​ຢ່າ​ມາ​ເດີ້​! ອອກ​ໄປ​ເດີ້​! ທີ່​ນີ້​ບໍ່​ຍິນ​ດີ​ຕ້ອນ​ຮັບ ຢ່າ​ເກີດເດີ້​! ຢ່າ​ເກີດ​ໃນ​ຫົວ​ໃຈ​ຂ້າ​ພະ​ເຈົ້າ​!” ຖ້າໃຈ​​ຍັງ​ບໍ່ນິ້ງ ໃຫ້​ວ່າ​: “ພວກ​ທ່ານຢ່າ​ເກີດ​ໃນ​ຫົວ​ໃຈ​ຂອງ​ຂ້າ​ນ້ອຍເຖີດ​!” ຈົ່ງ​ວ່າ​ແນວ​ນີ້ ວິ​ທີ​ຕັດ​ກະ​ແສ ຈະ​ມາ​ທາງ​ໃດ​ກໍ​ຕາມ ຈະ​ເກີດ​ທາງ​ຄວາມ​ຮູ້​ສຶກ​ນຶກ​ຄິດ​ກໍ​ຕາມ ຕ້ອງໃຫ້​ຮູ້​ທັນຕ້ອງ​ຕິດ​ຕາມຕ້ອງ​ເບິ່ງ ຕ້ອງ​ເຝົ້າ​ເວນ​ຍາມຢູ່​ທີ່​ຕາ ຫູ ດັງ ລີ້ນ ກາຍ​ໃຈ​ເຈົ້າ​ຂອງ​, ເອົາ 5 ຂໍ້ ນີ້​ໄປ​ເປັນ​ຄູໄປ​ເປັນ​ອາ​ຈານ​, ເອົາ 9 ຂໍ້ ແລະ 8 ຂໍ້ ແລະ 5 ຂໍ້ ໄປ​ຕັດ​ສະ​ຮູ້​ເອົາ​ເອງ​.

 

ການຕັດ​ສະ​ຮູ້ ກໍ​ຄື​ຕັດ​ຄວາມ​ບໍ່​ຮູ້​ບໍ່​ແຈ້ງ​ອອກ ຕັດ​ຄວາມ​ຫຼົງ​ໄຫຼ​ອອກ ຕັດ​ຄວາມ​ເຫັນ​ແກ່​ຕົວ​ແກ່​ໃຈອອກ ​ຕັດຄວາມ​ເຫັນ​ວ່າ​ຕົວ​ຕົນ​ເຈົ້າ​ຂອງ ແລະ​ຕັດ​ຄວາມ​ເຫັນ​ວ່າ​ເຈົ້າ​ຂອງ​ດີ​ແລ້ວ ເກັ່ງ​ແລ້ວຈົບ​ແລ້ວ ຕັດ​ຄວາມຍຶດ​ໝັ້ນ​ຖື​ໝັ້ນ ຄື​ຕັດ​ສິ່ງ​ທີ່​ເຂົ້າ​ມາ​ຜູກທີ່​ເຂົ້າ​ມາ​ມັດ​ເອົາ​ເຈົ້າ​ຂອງ ແລ້ວ​ກໍ​ຕັດ​ຄວາມ​ຄິດ​ອອກ ຕັດ​ຄວາມຄິດ​ເຈົ້າ​ຂອງ ຕັດ​ເອົາ​ແນວ​ຄວາມ​ຄິດທີ່​ມັນ​ບອກ​ໃຫ້​ຄິດ ທີ່​ມັນ​ບອກ​ໃຫ້​ຄິດ​ໄປ​ຕ່າງໆ​ນາໆ ຕັດ​ພວກບອກຕັດ​ໜ່ວຍ​ປຸງ​ແຕ່ງ ຕັດ​ແມ່​ທັບ​ຊຸມ​ນີ້ ຕັດ​ຜີ​ອອກເອົາ​ໄວ້​ແຕ່​ພຣະ ຕັດ​ໂຕ​ພາ​ໃຫ້​ຂາດ​ການ​ພິ​ນິດ ຂາດ​ການ​ພິ​ຈາ​ລະ​ນາ ຄື​ຕັດ​ຄວາມ​ໂງ່​ເຈົ້າ​ຂອງ​ອອກ ຕັດ​ພວກ​ນີ້​ອອກ​ໄດ້​ແລ້ວ ຖື​ວ່າ​ພໍ່​ມານ​ແມ່​ມານ​ຕາຍໄປ​ເອງ ຕາຍ​ດ້ວຍ​ອຶດ​ອາ​ຫານ ຕາຍ​ແບບ​ຍອມ​ຕາຍ​ເອງ ໃນ​ເມື່ອ​ຕາຍ​ເໝິດ​ແລ້ວ ກໍ​ເຫຼືອ​ແຕ່​ພຣະ​ພຸ​ທ ພຣະ​ທັມ ພຣະ​ສົງ​ຄ໌​ຢູ່​ໃນ​ຫົວ​ໃຈ ກໍ​ເປັນ​ແກ້ວ​ພຣະ​ຣັຕ​ຕະ​ນະ​ຕຣັຍ​ໄດ້ ເພາະ​ວ່າ​ແກ້ວ​ທັມ​ມະ​ຊາດ ຖ້າ​ໃສພຽງ​ພໍ ຈິ່ງ​ເອີ້ນ​ໄດ້​ວ່າ “ພຣະ​ຣັຕ​ຕະ​ນະ​ຕຣັຍ​” ເພາະ​ວ່າ​ເປັນ​ພຣະ​ວິ​ເສດ ເສດ​ຄຳ​ສັ່ງເສດ​ຄຳ​ສອນ​ອອກ ເສດ​ສັຈ​ຈະ​ທັມ​ຄຳ​ສອນ​ອອກ ເສດ​ອອກ​ສອນ​ຊາວ​ໂລກ ເສດ​ແບບ​ນີ້ ເສດ​ໃຫ້​ຮູ້ເສດ​ໃຫ້​ຕື່ນ ເສດ​ໃຫ້ເບີກ​ບານ​! ໃຫ້​ຜູ່​ເປັນ​ຮ່າງ​ກາຍ​ຮູ້ຕື່ນເບີກ​ບານ​! ໃຫ້​ຜູ່​ເປັນ​ຫົວ​ໃຈ​ຮູ້ຕື່ນເບີກ​ບານ​! ໃຫ້​ຜູ່​ເປັນ​ພາ​ກ​ສ່ວນ​ປະ​ສາດ ​ຮູ້ຕື່ນເບີກ​ບານ​! ໃຫ້​ຜູ່​ເປັນ​ລະ​ບົບ​ສະ​ໝອງ ​ຮູ້ຕື່ນເບີກ​ບານ​! ຖື​ວ່າ​ເສດ​ໃຫ້​ຜູ່​ເປັນ​ຄົນ ເປັນ​ຜູ່​ຮູ້ຜູ່​ຕື່ນຜູ່​ເບີກ​ບານ​! ແລະ​ວິນ​ຍານ ແລະ​ດວງ​ວິນ​ຍານ​ຂອງ​ເຈົ້າ​ຂອງ ໃຫ້​ຮູ້ໃຫ້​ຕື່ນໃຫ້​ເບີກ​ບານ​ນຳ​ກັນ​! ຖື​ວ່າເສດ​ໃຫ້​ແຈ້ງ​ໃຫ້​ສະ​ຫວ່າງ ແກ້ວ​ວິ​ເສດ​ໂດຍ​ທັມ​ມະ​ຊາດ ແມ່ນ​ເສດ​ເພື່ອ​ແນວ​ນີ້ ບໍ່​ມີ​ຈຸດ​ປະ​ສົງ​ອື່ນ ແລະບໍ່​ມີ​ເປົ້າ​ໝາຍ​ອື່ນ ຂໍ​ໃຫ້​ຜູ່​ຖາມ​ຈົ່ງ​ໂຊກ​ດີ! ຂໍ​ໃຫ້​ທ່ານ​ຜູ່​ຊ່ຽວ​ຊານ​ຖາມຈົ່ງ​ໂຊກ​ດີ! ໂຊກ​ດີ​ໄປ​ທົ່ວ​ເຖິງທຸກໆ​ລະ​ບົບ​!, ຄວາມ​ໂຊກ​ດີ​ອັນ​ນີ້ ຂໍ​ຈົ່ງ​ເຜື່ອ​ແຜ່​ໄປ​ທຸກ​ຫົນ​ທຸກ​ແຫ່ງ ທຸກ​ທິດ​ທຸກ​ບ່ອນ ທຸກໆ​ພື້ນ​ທີ່​ທັງເບື້ອງ​ຕ່ຳ ແລະ​ທັງ​ເບື້ອງ​ສູງ ຈົ່ງ​ໄດ້​ຮັບ​ຄວາມ​ໂຊກ​ດີ​ນຳ​ກັນ​.  (ຈົບ).

 

ເວ​ລາ 6.45ມ-10.05​ມ, ວັນ​ທີ 24.03.2013

(ໃຊ້​ເວລາ​ສົ່ງ​ສັຈ​ຈະ​ທັມ​ຄຳ​ສອນ ແລະ​ຈົດ​ໄວ້ 3 ຊົ່ວ​ໂມງ 20 ນາ​ທີ​,​

ຜູ່​ຈົດ​ໄວ້​:​ ທ່ານ ຄຳ​ສອນ ຫຼັກ​ໄມ​ຕຣີ, ຜູ່​ຕີ​ພິມ ທ່ານ ນາງ ດ​ຣ. ມະ​ນີ​ສົດ ແກ້ວ​ດາ​ລາ​)

 

 

 

Share
comments

ສະແດງຄວາມຄິດເຫັນໃນຂ່າວນີ້


Security code
Refresh